Jokabide zibikoa eta herri jabariaren erabilera, okupazioa eta garbiketa arautzeko
AURKIBIDEA
ARRAZOIEN AZALPENA
ATARIKO TITULUA
I Kapitulua. Xedapen orokorrak
1. Artikulua Xedea
2. Artikulua Aplikazio eremua
3. Artikulua Herri jabariaren erabilerari buruzko printzipio orokorrak
4. Artikulua Erabilitako kontzeptuen terminologia
5. Artikulua Lizentziak eta baimenak
II. Kapitulua Bide publikoen izendapena eta errotulazioa
6. Artikulua Bide publikoen izendapena
7. Artikulua Bide publikoen errotulazioa
II. TITULUA. JOKABIDE ZIBIKOA HERRI JABARIAN
I: Kapitulua. Xedapen orokorrak
8. Artikulua Jokabide arau orokorrak herri jabarian
9. Artikulua Elkartasuna herri jabarian
10. Artikulua Ondasun publikoen erabilera
11. Artikulua Agintaritzaren agenteen eta udal zerbitzuen jokabidea
II. Kapitulua. Jokabide zibikoa
12. Artikulua Hiri altzariak eta espazio publikoak babestea
13. Artikulua Berariazko debekuak
14. Artikulua Parke eta lorategi publikoak
15. Artikulua Edari alkoholdun eta drogen kontsumoa. Arma eta tresna arriskutsuak
16. Artikulua Eskaletza
II. TITULUA HERRI JABARIAREN GARBIKETA
I. Kapitulua Herri jabariaren garbiketa erabilera arruntaren ondorioz
I. Atala Herri jabariaren garbiketa herritarren erabilera arrunt eta orokorraren ondorioz
17. Artikulua Udalaren betebeharra
18. Artikulua Herritarren betebeharrak
19. Artikulua Berariazko debekuak
20. Artikulua Paperontzien erabilera
II. Atala Merkataritza eta industria jarduerei loturiko garbiketa.
21. Artikulua Inguruko eremuaren garbiketa
22. Artikulua Erakusleihoak
23. Artikulua Olanak eta pertsianak
24. Artikulua Errotuluak, plakak eta gainerako bereizgarriak
25. Artikulua Isurtzeak
26. Artikulua Zamalanak
III. Atala Animaliak eraman edo edukitzeari loturiko garbiketa.
27. Artikulua Arreta eta elikatzea
II. Kapitulua Egiten diren obrei loturiko bide publikoaren garbiketa.
28. Artikulua Neurriak hartzea
29. Artikulua Obraren babesa
30. Artikulua Masaderak
31. Artikulua Material garraioa (lurra, zaborrak,agregatuak, eta abar)
32. Artikulua Obretako edukiontziak
III TITULUA. HIGIEZINEN KANPOALDEA GARBITZEA
I. Kapitulua Higiezin publiko eta pribatuak eta hiri paisaia errespetatzea.
33. Artikulua Eraikinen elementuak eta kanpoaldea garbitzea eta mantentzea
34. Artikulua Pankartak, kartelak, banderak eta eranskailuak
35. Artikulua Pintadak eta grafitiak
II. Kapitulua Urbanizazioak eta orubeak garbitzea.
36. Artikulua Espazio pribatuak garbitzea
37. Artikulua Orubeak eta lursail pribatuak
IV. TITULUA. HERRI JABARIA HARTZEA
I. Kapitulua Xedapen orokorrak
38. Artikulua Irizpide orokorra
39. Artikulua Erabilera komun berezia
40. Artikulua Estetika
41. Artikulua Erabilera orokorra
II. Kapitulua Herri jabariaren elementuak
42. Artikulua Makinak eta objektuak herri jabarian
43. Artikulua Erakustokiak herri jabarian
44. Artikulua Herri jabarian filmak filmatzea
45. Artikulua Herri jabarian dauden kioskoak
46. Artikulua Kiosko motak
III. Kapitulua Bide publikoaren garbiketa erabilera komun bereziaren, erabilera pribatiboaren eta ekitaldi publikoen ondorioz
47. Artikulua Erabilera berezi edo pribatiboak ukituriko eremuaren garbiketa
48. Artikulua Ekitaldi publikoak egitea
49. Artikulua Jaialdietan animaliak erabiltzen direnean
50. Artikulua Kanpatzea
V. TITULUA ZIGOR ERREGIMENA
I. Kapitulua Arau-hausteak eta zigorrak
51. Artikulua Arau-hausteak
52. Artikulua Arau-hauste motak
53. Artikulua Zigorrak
54. Artikulua Isunen ordezko borondatezko lanak
II. Kapitulua Erantzuleak
55. Artikulua Erantzuleak
56. Artikulua Kalteak ordaintzea
57. Artikulua Zigor prozedura
58. Artikulua Preskripzioa
XEDAPEN GEHIGARRIA
AZKEN XEDAPENA
JOKABIDE ZIBIKOA ETA HERRI JABARIAREN ERABILERA, OKUPAZIOA ETA GARBIKETA ARAUTZEKO UDAL ORDENANTZA
ARRAZOIEN AZALPENA
Gure hiriak beti elkarbizitzarako gune izan dira. Gure kaleetan paseatu egiten zen, gure seme-alabak jolasean ibiltzen ziren eta gure plazetan ospakizun eta festak egiten ziren. Baina, azken hamarkadetan gure hiriak handitu egin ziren, eta arbasoek eskaini zieten xarma hori galdu zuten.
Hiri espazioei eragin zien krisi sozial, politiko eta industrialak eta biztanleek beren arazoetan soilik murgiltzeak ekarri zuten hiriek iraganean izan zuten izpiritu hiritarra, irekia, tolerantea, arduratsua, zibikoa, azken finean, galtzea.
Ahalegin handia eginda, hiriak elkarbizitzarako zituen balioak, tolerantzia eta ardura zibikoa esate baterako, berreskuratzen joan dira. Herritarrek, erakundeek, gizarte eragileek eta eragile ekonomikoek guretzat eta gure seme-alabentzat nahi dugun bezalako hiria eraikitzeko lanari ekion diogu.
Bizikide izateak errespetatzea dakar, baina ez lagun hurkoa errespetatzea soilik, lagun hurkoak berekin duen guztia baizik: bere lana eta bere ilusioak. Herritar guztiok harmoniaz betetako hiria dugu amets, askatasunean bizitzeko aukera emango diguna, inguruan ditugun pertsonak eta gauzak errespetatuz. Izan ere, besteak errespetatzeak besteek eraikitzen dutena errespetatzea esan nahi du. Eta errespetu horrek eraman behar gaitu hiria egiteko ardura partekatua gure gain hartzera, jokabide zibikoko jarraibide batzuen arabera. Errenteria gizarte alorrean hiri kohesionatuagoa izatea lortu behar dugu, zibikoa, garbi eta abegikorra, pertsonen eskubideak errespetatzen dituen hiria, ondarea, ingurumena, gune publikoak eta hiri eta landa eremua babesten dituena. Baina, eragile guztien inplikazioa izan ezean, ez dago helburu hori lortzerik: herritarrak, erakundeak, gizarte eragileak, kultur eta hezkuntza taldeak, eragile ekonomikoak eta abarrek lan horretan inplikatzea nahitaezkoa da.
Errenteriako herritar nahiz Errenteriara datozen bisitariek bere gain hartu behar dute zibismoz jokatzeko konpromisoa, Errenteriarekiko nahiz herritarrekiko hartu beharreko konpromisoa da hori. Gutxiengo baten gizalegetik kanpoko jokabide batzuek, guztion ondare diren ondasun eta espazioak kaltetzeaz gain, elkarbizitzari egindako erasoak dira, eta dagozkion eskubide eta betebeharrak zibikoki bere gain hartzen dituen gehiengo handiarekiko elkartasunik eta errespeturik ezaren jarrera adierazten dute.
Errenteriako Udalak azken urte hauetan ahalegin handia egin du herritarren bizi-kalitatea hobetzeko. Erdigunean oinezkoentzako eremuak sortzea, erdigunetik ibilgailuen trafikoa murriztea, parke eta plazak egitea, arkitektura trabak kentzea, pintadak garbitzeko etengabe ahalegintzea, hiri altzariak berritzea, bideak garbitzea, publizitate panel handiak kentzea, kaleen itxura hobetzea eta abar bezalako jarduerek, zalantzarik gabe, lagundu egiten dute herritarrengan zibismoaren aldeko jarrerak sortzen.
Baina, etengabeko nahi horren ondoan nolabaiteko frustrazioa ere aurki dezakegu; izan ere, behin eta berriro antzeman dezakegu egiten diren hobekuntzak ez direla kontsolidatzen espazio publikoetan egiten den erabilera okerraren ondorioz kalteak direlako.
Gure hiriak, beste hiri askok bezalaxe, hainbat arazoren ondorioak jasan behar ditu, hala nola pintadak, grafitiak eta kartelak, lurrera zikinkeriak botatzea, kontrolik gabeko publizitatea, hiri altzariak eta haurren jokoak hondatzen dituzten jokabide bandalikoak.
Errenteriako Udalak honako Ordenantza hau prestatu du jokabide zabar eta arduragabe horiek zuzentzeko tresna gisa.
Ildo horretan, Ordenantza honen xedea da bide eta gune publikoetan jokabide egokirako oinarrizko arau batzuk ezartzea. Arau horiek pertsonen askatasuna bermatuko dute, Errenteriaren hiri eta natur ondasunaren errespetuaren barruan eta bizileku dugun ingurua egoki zainduta.
ARRAZOIEN AZALPENA
I. KAPITULUA
Xedapen orokorrak.
1. Artikulua- Xedea.
Ordenantza honen xedea da herri jabarian jokabide zibikoa arautzea, baita herri jabariaren garbiketa eta okupazioa arautzea ere, bertan egiten diren erabilera guztiei loturik.
Era berean, Ordenantza honek eraikuntzarako Udal Ordenantzen erregulazio osagarria du xede, fatxada herri jabarira duten higiezinen edo eraikin publiko eta pribatuen apaingarriei dagokienean.
2. Artikulua- Aplikazio eremua.
Ordenantza hau Errenteria osoan aplikatuko da eta bertako biztanleek nahiz bisitariek bete beharko dute.
3. Artikulua.- Herri jabariaren erabilerari buruzko printzipio orokorrak
1.- Bide publikoak, espazio publikoak, instalazioak eta haietan kokaturiko hiri altzariak herritar guztiek erabili eta gozatzeko dira, ondasunen izaeraren arabera eta norbere askatasun printzipioak eta gainerako pertsonekiko errespetua kontuan harturik.
2.- Herri jabarian egiten diren jarduerek ezin dute mugatu gainerako pertsonek duten erabilera eskubidea, erabilera arrunt berezi edo erabilera pribatiborako lizentzia edo baimena dagoenean izan ezik.
3.- Alkatetzari dagokio herri jabarian egiten diren erabilera eta jarduerak zehaztu eta bateratzea, eta une bakoitzean interes publikoari begira premiazkoak direnei emango zaie lehentasuna. Horrenbestez, aldi baterako debekatu edo mugatu egingo dira eragozpenak edo bateraezintasunak sortzen dituzten jarduerak.
4. Artikulua.- Erabilitako kontzeptuen terminologia.
Hona hemen Ordenantza honetan erabilitako kontzeptuen terminologia:
1.- HERRI JABARIA.- Ordenantza honen ondorioetarako, herri jabaritzat hartzen dira kaleak, plazak, zirkulazio bideak, bide publikoak, pasealekuak, hiribideak, espaloiak, bulebarrak, parkeak eta lorategi eremuak, aisialdirako eremuak, bideetako tunelak eta hiritarren erabilera orokorrerako erabilera publiko edo pribatuko gainerako ondasunak.
Era berean, arau honen aurreikuspenak aplikatuko dira urbanizatu gabeko udalaren jabetzako eremuetan eta Udalak, Udal Erakunde Autonomoek eta haren mendeko erakundeek kudeaturiko lurzoru urbanizagarri eta urbanizaezinean eta beste espazio publikoetan.
2.-HIRI ALTZARIAK.- Izen honen barruan sartzen dira eserlekuak, paperontziak, jokoak, iturriak, farolak, hitoak, seinaleak, hondakinen edukiontziak, estatuak, eskulturak, loreontziak, kioskoak, markesinak eta herri jabarian dauden gainerako elementuak.
3.- HIRI ZUHAITZAK: barruan daude bide eta gune publikoetan habitata duten baso multzoak, zuhaitzak eta banaka nahiz taldeka jarrita dauden zuhaixkak eta abar.
4.- HONDAKINAK.- Hondakin gisa hartzen da apirilaren 21eko 10/1998 Hondakinen Legearen Eranskinean jasotako kategorietan sartzen den substantzia, materia edo produktu oro, jabeak baztertu edo bota duenean edo botatzeko asmoa edo betebeharra duenean.
5.- TRESNA EDO OBJEKTU ARRISKUTSUAK. Ordenantza honen ondorioetarako, arriskutsutzat hartuko dira tresna zorrotz eta mingarri guztiak eta dituzten izaera eta ezaugarriengatik hiritarren osotasun fisikoa kaltetu dezaketen guztiak, hala nola animaliak eta animalien hondakinak, drogen kontsumorako xiringak eta tresnak, arreta sanitarioa ematerakoan erabilitako materialak, gaixotasunak kutsatu ditzaketenak, droga toxikoak, estupefazienteak eta produktu kimiko, erradiaktibo, pirotekniko edo leherkorrak. Baita berez esparru profesional edo kirol esparruetakoak diren objektuak ere, sortu ziren erabileratik kanpoko zirkunstantzia berezietan eta behin-behinean eramaten direnean. Besteak beste, honakoak izango lirateke: mailuak, mazoak, beisboleko bateak, arte martzialetan eta kontaktu fisikoko kiroletan erabiltzen diren objektuak, kateak, metalezko barrak, pioletak eta abar.
6.- ESKALETZA.- Ordenantza honen ondorioetarako, eskaletza deituko zaio herri jabarian eskean ibiltzeari.
7.- PINTADAK: Pintadatzat hartuko dira eskuz edo beste edozein modutan herri jabarian, zoladuretan eta eraikinetako horma eta paretetan, edo egiturazko edo hiri altzarietako edozein elementutan eginiko inskripzioak. Hemen sartzen dira altzarien kristalak edo bide publikoa marratzeko ekintza guztiak, oro har.
5. Artikulua.- Lizentziak eta baimenak.
1.- Udal obra lizentzietan eta Ordenantza honetan aurreikusitako lizentzia eta baimen guztietan fidantza bat jartzeko eskatu ahal izango da, herri jabariaren garbiketa eta apaindura publikoari loturiko betebeharrei erantzungo zaiela bermatzeko.
2.- Azken horiek epe jakin baterako emango dira beti, eta epe hori amaitu baino lehen baliogabetu ahal izango dira.
II. KAPITULUA
Bide publikoen izendapena eta errotulazioa.
6. Artikulua.- Bide publikoen izendapena.
Bide publikoak izen batez identifikatuko dira, bakoitzak berea izango du, eta Udalbatzaren Osoko Bilkurak onartuko ditu izen horiek.
7. Artikulua.- Bide publikoen errotulazioa.
1.- Bide publikoen errotulazioak zerbitzu publikoaren izaera du, eta plaka, zutoin edo antzeko baten bidez egin ahal izango da. Plaka hori ageriko lekuan jarriko da, gutxienez bide publiko bakoitzaren sarreran eta irteeran. Plazetan, berriz, eraikin nagusian eta sarbide nagusietan jarriko da.
2.- Bide publikoen errotulazio hori higiezin pribatuen fatxadetan jarri ahal izango da, eta jabeek nahitaez horretarako baimena eman beharko dute.
3.- Era berean, higiezinen jabeek Gabonetako apaingarriak jartzeko fatxadetan ipini beharreko euskarriak egokitzeko baimena ematera derrigortuta daude, baita Udalaren iritziz interesgarriak diren aldi baterako apaingarriak edo jardueren seinalizaziorako beharrezkoak diren euskarriak jartzeko ere.
4.- Debekatuta dago kaleen izendapenerako erabilitako plakak edo aurreko atalean adierazitakoak, hau da, Gabonetako apaingarriak, aldi baterako apaingarriak eta seinalizazioak hondatu, kendu edo aldatzea.
II. TITULUA
JOKABIDE ZIBIKOA HERRI JABARIAN
I. KAPITULUA
Xedapen orokorrak.
8. Artikulua.- Jokabide arau orokorrak herri jabarian.
1.- Herritarrek bide eta espazio publikoak askatasun osoz erabiltzeko eskubidea dute, eta askatasun hori errespetatu egin behar zaie. Ondasun publikoen erabilerari buruzko xedapenek eta beste pertsonak eta ondasun pribatuak errespetatzeko beharrak mugatzen dute zibismoz erabili behar den eskubide hori.
Arau-hauste administratiboa izango da segurtasun kolektiboa nahastea edo bide publikoetan, espazio edo establezimendu publikoetan nahasmenduak sortzea, hori arau-hauste penala ez denean.
2.- Inork ere ezin du, herri jabarian duen jokabidearengatik, gainerako pertsonen eskubideak eta ekintzarako askatasuna gutxietsi, eta ezin ditu orokorrean onartzen diren usteak eta bizikidetza arauak iraindu. Ez dira onartuko jokabide exhibizionistak, jarrera arrazista eta xenofoboak edo herritarren berdintasun, askatasun edo duintasunaren aurkako jarrerak.
3.- Herritarrek eskubidea dute hiri eta landa eremuez eta aisialdirako eremuez lasaitasun eta atsedenez gozatzeko.
9. Artikulua.- Elkartasuna herri jabarian.
1.- Udalak herritarren jokabide solidarioa sustatuko du herri jabarian, bidean ibili edo orientatzeko laguntza behar duten pertsonei, eta istripua izan duten edo arriskuan dauden pertsonei laguntzeko. Era berean, igarotzerakoan edo hiri altzariak erabiltzerakoan behar handiena duten pertsonei lehentasuna emateko ohitura bultzatuko da, baita beste elkartasun eta hezkuntza jokaera batzuk ere.
2.- Haurrak edo pertsona ezinduak galduta, edo fisikoki nahiz psikikoki gaizki dauden pertsonak aurkitzen dituzten pertsona guztiek agintaritzaren agenteei jakinaraziko diete, eta horiek arduratuko dira pertsona horiek babesteaz eta haien tutoretza eta ardura dutenengana itzultzeaz.
10. Artikulua.- Ondasun publikoen erabilera.
Ondasun publikoak duten izaeraren arabera erabili behar dira, betiere egoki eta behar bezala erabilita, eta gainerako herritarrek ere ondasun horiek erabiltzeko duten eskubidea errespetatuz
11. Artikulua.- Agintaritzaren agenteen eta udal zerbitzuen jokabidea.
1.- Agintaritzaren agenteek eta udal zerbitzuek uneoro errespetuz eta gizalegez tratatuko dituzte herritarrak, eta behar dutenei laguntza eta babesa eskainiko dizkiete. Beren esku-hartzeetan beharrezko informazio guztia emango dute beren ekintzen arrazoi eta helburuen inguruan.
2.- Agintaritzaren agenteek egokitzat hartzen dituzten aginduak eta jarraibideak eman ahal izango dizkiete herritarrei, Ordenantza honetan jasotako zehaztapenak beteko direla ziurtatzeko. Arau-hauste administratiboa izango da agintaritzaren edo bere agenteen aginduak ez betetzea, agindu horiek Ordenantza honetan edo indarrean dagoen beste legeriaren batean xedaturikoa zuzen aplikatuta ematen direnean, eta arau-hauste penala ez denean.
3.- Kasu larriak direla eta pertsonen gaineko agintea erabiltzea beharrezkoa denean, eta 1. atalaren arabera jardun ondoren, ezinbestekoak diren indar-ekintzak baino ez dira erabiliko, pertsonen duintasuna erabat errespetatuz.
II KAPITULUA
Jokabide zibikoa.
12. Artikulua.- Hiri altzariak eta espazio publikoak babestea.
1.- Herritar guztiek hirian dauden hiri altzariak egoki eta behar bezala erabiltzeko betebeharra dute, altzari horiek errespetatu egin behar dira, haien kontserbazio eta erabilera arrunterako hondamenik sortu gabe.
2.- Debekatuta daude hiri altzariak eta espazio publikoak zikindu eta hondatzen dituzten edo honda ditzaketen ekintzak burutzea, eta bereziki, honako ekintza hauek:
a) Eserlekuak beren erabilera naturalaren aurka erabiltzea: ezin dira zapaldu, ezin dira dauden lekuetatik kendu, ez hautsi, ez zikindu eta, oro har, ezin da haien erabilera kaltetu edo kontserbazioa hondatuko duen ezer egin.
b) Debekatuta dago jokorako tresnak modu txarrean eta kalte egin edo hausteko moduan erabiltzea, baita helduek edo, adingabeak izan arren, jokoan ageri den adina gainditzen duten haurrek erabiltzea ere. Joko horietako bakoitza erabiltzeko adin egokia zein den azaltzen duen plaka izango dute jokoek.
c) Debekatuta dago zaborrak, pipak, txikleak edo paperak zeregin horretarako dauden paperontzietatik kanpo botatzea.
d) Debekatuta dago paperontziak irauli edo beren tokietatik ateratzea, baita haien itxura eta osotasuna honda dezaketen bestelako ekintzak gauzatzea ere.
e) Debekatuta dago hiri hondakinak botatzekoak diren paperontzi eta edukiontzietan tresna edo objektu arriskutsuak botatzea.
f) Debekatuta dago iturri publikoetako tutuak, kanilak eta gainerako elementuak manipulatzea haien funtzionamendu normaletik kanpo. Debekatuta dago dekorazio iturriak zikintzea, eta bertako ura garbitu, bainatu edo barruan sartzeko erabiltzea. Era berean, debekatuta dago iturri horietara edozein detergente, koloragarri edo produktu kimiko botatzea.
g) Debekatuta dago hirian dauden zuhaitz, farola, estatua, seinale eta gainerako apaingarriak kaltetuko dituen edozein ekintza edo manipulazio, baita elementu horiek hondatzen dituzten ekintzak ere.
h) Debekatuta dago herri jabarian sua eta ekintza piroteknikoak egitea udalaren eta alor horretan eskumena duten administrazioen derrigorrezko baimenik gabe. San Joan bezperako suak eta antzekoak egiteko, udalaren baimena lortu beharko da aurrez jakinarazita.
i) Hirigunearen barruan barbakoen eta antzekoen erabilera mugatua egongo da duten arriskuarengatik edo gainerako herritarrei sortzen dizkieten eragozpenengatik. Baimena emango da jaiak edo interes orokorreko ekintzak direla eta egiten direnak egiteko.
j) Debekatuta dago aisialdietarako eremuetan erretegi eta baimenduetako barbakoetatik kanpo sua egitea.
k) Debekatuta dago animaliei bide publikoko gizakien kontsumorako iturrietatik zuzenean edaten uztea.
13. Artikulua.- Berariazko debekuak.
1.- Debekatuta dago herri jabarian kirol edo aisialdiko jarduerak burutzea, pertsona edo ondasunei kalteak edo hiritarrei eragozpenak eragiteko moduko objektuak edo tresnak erabiltzen badira, horretarako baimendutako leku eta eremuetan eta baimendutako ordutegietan izan ezik. Plazetan jokoan edo jolasean ibili daitekeen lekuak zehaztuko dira, horrelakorik egiterik baldin badago behintzat.
Azalpen gisa, esango genuke, debekatuta dagoela kale eta plazetan pertsonei eta jabetza pribatuei arrisku edo kalte nabarmenak eragin diezazkieketen baloi, disko hegalari, boomerang eta abarrekin jolastea.
2.- Debekatuta dago herri jabarian petardoak edo bengalak erabiltzea, eta debekatuta dago edozein moldetako objektuak jaurtitzen dituzten tresna edo gailuak erabiltzea, esate baterako, arkuak, zerbatanak, tiragomak eta bolak botatzen dituzten pistolak.
3.- Debekatuta dago fatxadetatik aurrera ateratzen diren loreontziak eta abar jartzea, eraikineko berezko elementuek behar bezala eusten ez dietenean.
14. Artikulua.- Parke eta lorategi publikoak.
1.- Herritarrek herriko parke eta lorategi publikoak errespetatzeko betebeharra dute.
2.- Parke, lorategi eta loreontzietako espezieak eta herri jabarian aldatutako landareenak ongi kontserbatu eta mantendu ahal izateko, erabat debekatuta daude honako ekintza hauek:
a) Landareak lapurtzea.
b) Soropila eta landareak hondatzea edo bertan kanpatzea, berariaz baimenduta dagoen parkeetako espazioetan izan ezik.
c) Zuhaitzak eta zuhaixkak bota, inausi eta haustea, edo horiek kaltetzen dituzten produktu toxikoak botatzea. Aldi baterako bada ere, obra materialak, tresnak eta makineria zuhaitzetan pilatzea.
d) Herri jabarian landare espezieak aldatu edo ereitea.
e) Zuhaitzetara igotzea.
f) Zuhaitzen azaletan gauzak idatzi edo margotzea, punta zorrotzak sartzea, zuhaitz horiei eskailerak edo tresnak eta aldamioen euskarriak lotzea eta kartelak jartzea.
g) Berdeguneetan, haiek hondatzeko edo duten estetika eta erabilera ona kaltetzeko moduko zaborrak, hondakinak, harriak, legarra edo beste edozein produktu botatzea.
h) Parke eta lorategietan sua edo suteak piztea, berariaz baimendutako lekuetan izan ezik.
i) Bizikletak parkeetan ibili ahal izango dira baldin eta bertan dagoen jende kopuruak horretarako aukerarik ematen badu eta oinezkoei eragozpenik sortzen ez badiete.
3.- Mantentze-lanaren ardura (inaustea, moztea, landareak aldatu edo ereitea, tratamenduak ematea…) Udal Zerbitzuena da.
4.- Oro har, herriko zuhaitzek eta zuhaixkek itxura naturala mantenduko dute, eta Udalak instalazio, fatxada, linea elektriko eta abarrei kaltea sortzen dietenak baino ez ditu moztuko.
15. Artikulua.- Edari alkoholdun eta drogen kontsumoa. Arma eta tresna arriskutsuak.
1.- Edari alkoholdunen eta drogen kontsumoa, eta arma eta tresna arriskutsuak eraman eta erabiltzea, gai horretan indarrean dagoen araudian jasotako arauen arabera zigortuko da.
2.- Udaltzaingoak berehala konfiskatuko ditu drogak, substantzia estupefazienteak, substantzia psikotropikoak eta arma eta tresna arriskutsuak.
3.- Herri jabarian edari alkoholdunak kontsumitzeari dagokionean, debekatuta dago:
a) Herri jabarian edari alkoholdunak saldu eta kontsumitzea, beharrezko baimena duten terraza edo kanpoko mahaietan, feria egunetan, herriko jaietan, edo ekitaldi berezietan izan ezik.
b) Ostalaritza establezimenduetan edariak saldu edo hornitzea kanpoan (herri jabarian) kontsumitzeko, terrazetan edo beharreko udal baimena duten beste instalazio batzuetan izan ezik.
c) 18 urtetik beherakoei edari alkoholdunak saldu, hornitu eta kontsumitzea, bai salmenta lekuetan bai kontsumo lekuetan.
Era berean, adingabeei edari alkoholdunak hornitzearen erantzuleak izango dira, adin nagusikoak izanik eta establezimendu eta komertzioetako arduradunen kontroletik ihes egiteko, edari alkoholdunak erosi eta adingabeei ematen dizkieten hirugarren pertsona guztiak.
d) Debekatuta dago edariak taldean kontsumitzea, horrek beste erabiltzaile batzuei eragozpenak sortu edo espazio publikoak behar bezala erabiltzea ezinezkoa egiten dienean.
e) Segurtasun arrazoiak direla eta, jendetza handiak biltzen dituzten kontzertuak edo antzeko ekitaldiak bezalako ikuskizunetan, nahiz eta udal baimena izan, edari alkoholdunak saltzeko aukera barne, edari horiek plastikozko edalontzietan zerbitzatuko dira, eta inola ere ez dira onartuko kristal eta beirazko ontziak, ezta lata edo antzekoak ere.
4.- Tabakoaren kontsumoari dagokionean, erabat debekatuta dago udal areto guztietan erretzea, aire zabalean daudenetan izan ezik.
5.- Aplikazio berezikoak izango dira tabakoak saltzeko indarrean dagoen legediak ezarritako arauak, eta batez ere, tabakoa saltzeko makinen kokapena eta horien kontrolaren gainekoak, horrelakoak dituzten establezimenduetan.
16. Artikulua.- Eskaletza.
1.- Debekatuta dago adingabeak udalerriaren barruan eskean ibiltzea. Betiere adingabeen babesaren alorrean indarrean dagoen legeriak xedaturikoa beteko da.
2.- Debekatuta dago dirua edo limosna eskatzea bortxaz edo beldurra sorraraziz, hitzez edo egitez. Era berean, debekatuta dago diruaren ordez objektuak edo zerbitzuak eskaintzea, bortxaz eta beldurra edo eragozpenak sortuz. Udaltzaingoak bidezko jarduketak burutu ondoren eskumena duen Auzitegiari emango dio horren berri.
3.- Agintaritzaren agenteak, gizarte eta udal zerbitzuak eta beste erakunde batzuen zerbitzuak daudela jakinaraziko die beharra duten pertsonei, behar dituzten sorospen eta laguntza eska ditzaten, une bakoitzean indarrean dagoen protokoloaren markoaren barruan.
II. TITULUA
HERRI JABARIAREN GARBIKETA
I. KAPITULUA
Herri jabariaren garbiketa, erabilera arruntaren ondorioz.
1. Atala.- Herri jabariaren garbiketa herritarren erabilera arrunt eta orokorraren ondorioz.
17. Artikulua.- Udalaren betebeharra.
Udal zerbitzuek herriko espazio publikoak garbitasun eta osasun egokiko baldintzetan mantentzeko ardura dute. Horretarako, Udalak bidezko zerbitzu publikoa eskainiko du, beharrezko maiztasunarekin eta dagozkion zaintza eskumenak eta poliziari dagozkionak gauzatuko ditu.
18. Artikulua.- Herritarren betebeharrak.
1.- Herritar guztiak behartuta daude herria oro har eta bere espazio publikoak bereziki garbi mantentzera.
Udal zerbitzuek eta Udaltzaingoaren agenteek uneoro herritarrek garbiketa gai hauetan dituzten betebeharrak bete ditzaten zainduko dute, eta, kalterik sortuz gero, berehala eskatuko diete kalte hori konpontzeko, bidezko salaketa jartzearen kalterik gabe.
2.- Herritar guztiek, adinez nagusi direnetik aurrera, babes zibilean laguntzeko betebeharra izango dute, pertsonalki eta materialki, eskumena duten agintariek hala eskatuz gero.
19. Artikulua.- Berariazko debekuak.
1.- Debekatuta dago herri jabaria zikin dezakeen edozein jarduera egitea, eta bereziki debekatuta dago:
— Herri jabarian, ibai eta erreketako ertzetan, eta iturburu eta iturrietan ibilgailua edo bestelako objektu eta animaliak garbitzea.
— Herri jabarian kaka eta pixa egitea eta listua botatzea
— Zaborrak edo hiri hondakinak manipulatu edo aukeratzea, horiek sakabanatuta, bilketa zailduta edo edukiontziak aldatuta.
— Hondakinak nahiz panfletoak herri jabarira botatzea edo bertan uztea.
— Fatxadetan, faroletan eta gainerako hiri altzarietan iragarkiak itsastea, zerbitzuak eskainiz (akademiak, hizkuntza eskolak…), nahiz salmenten edo bestelako zerbitzuen berri emanez (ibilgailuak, apartamentuak…)
— Euri uren udal isurbideetan ur zikina isurtzea, garbigarriekin nahiz garbigarririk gabe, sotoak edo bestelakoak garbitzeko lanetan erabili ondoren.
— Herri jabarira edo pertsonak ibiltzen diren barruko patioetara ematen duten balkoietan, begiratokietan edo leihoetan alfonbrak astintzea.
2.- Panfletoak botatzen badira, banaketa horrek eragindako hiri espazioa garbitzeaz udal zerbitzuak arduratuko dira, eta horren erantzuleei leporatuko zaie emaniko zerbitzu berezien kostua, dagozkion isunak jartzeko aukeraren kalterik gabe.
3.- Herri jabarira edo pertsonak ibiltzen diren barruko patioetara ematen duten balkoietan, begiratokietan edo leihoetan dauden loreontziak edo landareak gaueko 23:00etatik goizeko 8:00ak arte soilik ureztatu ahal izango dira. Lan horiek kalterik eta eragozpenik ez sortzeko moduan egingo dira.
4.- Bereziki, debekatuta dago animalia hilak abandonatzea.
20. Artikulua.- Paperontzien erabilera.
1.- Bolumen txikiko hondakin solidoak, esate baterako, zigarro-mutur itzaliak, azalak, txikleak, eta antzekoak, paperontzietan bota behar dira, material birziklagarriak direnean izan ezik, kasu horretan herri jabarian jarritako gaikako bilketarako edukiontziak erabili behar baitira
2.- Debekatuta dago hondakin solido piztuak eta beste edozein materia piztu paperontzietan uztea
II. Atala- Merkataritza eta industria jarduerei loturiko garbiketa.
21. Artikulua.- Inguruko eremuaren garbiketa.
Merkataritza edo industria jarduera batek bere inguruetan, edo baimendutako espazioan terrazen kasuan, maiz zikinkeria sortu ohi badu, establezimenduko titularrak garbi eduki beharko du ukituriko herri jabariaren zatia, baita teilatu-hodiak, isurbideak eta zorrotenak ere, beren funtzioa behar bezala bete dezaten, dagozkien lizentziei aplikatu beharreko erregimenetik etor daitezkeen neurri zuzentzaile eta gainerako betebeharrei kalterik egin gabe.
22. Artikulua.- Erakusleihoak.
Erakusleiho, establezimendu, soto, salmenta puntu eta antzekoen garbiketa arreta handiz egingo da herri jabaria ez zikintzeko, eta bertan dabiltzanei eragozpenik ez sortzeko orduetan egingo da. Garbiketa horretatik etorritako hondakinak ezin izango dira herri jabarira isuri, eta dagokien edukiontzian botako dira, edo, likidoak baldin badira, garbiketa egin den lokaletako komunetan isuriko dira.
23. Artikulua.- Olanak eta pertsianak.
Lokaletako olanak eta pertsianak kontserbazio eta garbiketa egoera onean mantenduko dira, eta berritu egingo dira kanpoko itxurak hala eskatzen duenean.
24. Artikulua.- Errotuluak, plakak eta gainerako bereizgarriak.
Edozein errotulu, plaka edo bereizgarri herri jabariaren aldera jartzeko, beharreko lizentzia lortu beharko da. Horiek garbi edukiko dira eta hondatuak aldatu egingo dira. Norabideen seinaleei dagokienean, izaera publikoa edo erabilera publikoa duten zerbitzuei dagozkienak soilik jarri ahal izango dira, udalaren baimena lortu ondoren eta hartan zehazten diren kopuruak eta irizpideak kontuan harturik.
25. Artikulua.- Isurtzeak.
Generoa soltean, edo edozein materia ontziratu gabe garraiatzen duten ibilgailuak herri jabarira isurketarik ez egiteko moduan kargatu eta ekipatuko dira.
26. Artikulua.- Zamalanak.
1.- Edozein ibilgailuren zamalanak egiterakoan, zikindutako espaloi eta galtzadak berehala garbituko dira lan horiek amaitu bezain laster.
2.- Garbiketa horiek egiteko betebeharra dute ibilgailuen jabeek eta, subsidiarioki, zamalanak egin diren establezimendu edo finkaren titularrek. Titularrek ez badute egiten, udal zerbitzuek egingo dute garbiketa, baina gastuak beraiei kobratuko zaizkie.
II. Atala.- Animaliak eraman edo edukitzeari loturiko garbiketa.
27. Artikulua.- Arreta eta elikatzea.
1.- Herritarrek behar bezala zainduko dituzte etxe animaliak, eta bereziki, debekatuta dago animalia horiek kalean abandonatzea eta tratu txarrak ematea.
2.- Debekatuta dago animaliei jaten ematea edo edozein janari mota uztea normalean askatasunean bizi diren animalien eremuetan, edo horiek bertaratzen diren tokietan, zakurrak, katuak, ahateak, usoak eta abar, esate baterako, horretarako baimendutako tokietan izan ezik.
II. KAPITULUA
Egiten diren obrei loturiko bide publikoaren garbiketa.
28. Artikulua.- Neurriak hartzea.
1.- Jarduera eta obra guztiek beren titularrari herri jabaria zikintzea saihesteko neurriak hartzeko betebeharra ezartzen diete, bidezko lizentzietatik erator daitekeenaren kalterik gabe, baita herri jabaria behar bezalako maiztasunarekin garbitzekoa eta sortutako hondakin materialak bertatik kentzekoa ere.
2.- Udaltzaingoak arduradunari bidezko garbiketa ekintzak egin ditzan eskatu ahal izango dio.
3.- Eraikitze-, berritze- edo eraiste-lanak direnean, obra lizentziaren titularra izango da obra horiek eragindako herri jabariaren garbiketaren erantzule. Berarekin batera, obraren sustatzaileak eta lurzoruaren jabeak ere ardura izango dute.
Artikulu honen 1. atalean adierazitako neurriak bete ezean, bidezko isuna jartzeaz gain, Udaltzaingoak obrako ibilgailuak herri jabarira sartzeko debekua ezarriko du.
29. Artikulua.- Obraren babesa
1.- Zikinkeriarik ez biltzeko eta kutsadurari aurre egiteko, herri jabariari eragiten dioten edo eragin diezaioketen lanak edo obrak egiten dituzten pertsonek obra hori babestu egin beharko dute inguruan elementu egokiak jarrita, udal zerbitzuen irizpideen arabera, obrako lurrak eta soberako materialak baimendutako eremutik edo obra mugatzen duen perimetrotik kanpora isuri eta zabaldu ez daitezen.
2.- Debekatuta dago obraren perimetroaren barruan mugatuta ez dagoen herri jabarian lurrak, hondarrak, legarrak eta gainerako materialak biltzea, baita eusteko eta induskatzeko elementu mekanikoak eta gainerako tresna lagungarriak pilatzea ere, dagokion obra lizentzian udalaren berariazko baimena jasotzen ez bada. Betiere, espazio hori garbi edukiko da
3.- Udalak neurri zuzentzaile gisa ezarriko du, obra publiko nahiz pribatuetan, obrako materialak derrigorrez hezean moztea (zoladura zeramikoak, baldosak, hormigoiak…), atmosferara ahalik eta partikulan gutxien igortzeko.
4.- Lanegun bakoitza amaitzean, herri jabarian eginiko lan eremuak, zangak, kanalizazioak eta abar, garbi eta babestuak utziko dira eta, udal zerbitzuen irizpideei jarraiki, beharrezko seinaleak jarriko zaizkie, gauerako balizaje elementuak barne, istripurik gerta ez dadin.
30. Artikulua.- Masaderak.
1.- Debekatuta dago masadera-ibilgailuan hormigoia garraiatzea, hormigoi hori bide publikora ez isurtzeko beharrezko gailuaren bidez ez bazaio deskarga-ahoa ixten.
2.- Debekatuta dago masaderak herri jabarian eta horretarako egokia ez den beste edozein lekutan garbitzea.
3.- Aurreko bi atal horiek ez badira betetzen, ibilgailuaren jabea eta gidaria izango dira erantzuleak, eta erantzule subsidiarioa, berriz, obraren sustatzailea edo zerbitzua ematen dioten jardueraren titularra. Ondorioz, isurtzen den hormigoia eta ukituriko herri jabaria garbitzeko betebeharra izango dute, eta, horretaz gain, sortutako kalteari dagozkion zigorrak jarri ahal izango zaizkie.
31 artikulua.- Material garraioa (lurra, zaborrak,agregatuak, eta abar)
1.- Lur, agregatu, harkaitz, zabor eta orokorrean materialak garraiatzen dituzten ibilgailuak behar bezalako egoeran egongo dira, edukia herri jabarian eta atmosferan isurtzea saihestearren.
2.- Istripu, iraultze edo herri jabarian bestelako gorabeherek sortzen duten jauste edo jariatzerik izanez gero eta bide segurtasunean arriskurik sortu badezakete, gidariek ahalik eta azkarren jakinarazi beharko diote Udaltzaingoari. Gainera, berehala seinaleak jarri, materialak bildu eta arrisku-gunetik kanpo uzteari ekingo diote, garbiketa zerbitzuek eskain dezaketen laguntzari begira. Nolanahi ere, egotz daitekeen gorabehera horien kostua ibilgailuen jabeena edo gidariena izango da.
4.- Material eta zabor garraiolariak behartuta daude kaltetutako bide tartea berehala garbitzera, baldin eta herri jabaria zikinduko balitz zamalan eta garraio lanen ondorioz.
5.- Era berean, edozein unetan, eta Udal aginteak eskatutako guztietan, behartuta daude baimenik ez duten guneetan isuritako materialak (lurrak, zaborrak, jasotzera, eta abar), dagozkion zigorrei kalte egin gabe.
32 artikulua.- Obretako edukiontziak.
1.- Debekatuta dago obretako edozein hondakin-materialak edo zabor bertan behera uztea edo isurtzea herri jabarian, baita hiri hondakin solidoak batera edo gaika biltzeko edukiontziren batean uztea ere.
2.- Zaborrak eta obretako gainerako hondakin-materiala sortzen duten produkzio-jarduerako titularrek zuzenean garraiatu beharko dute, edo zeregin horietan baimenduta aritzen diren enpresek, hiri hondakin solidoen udal ordenantzak aurreikusten duen bezala.
3.- Behin beteta, obretarako edukiontziak behar bezala estaliko dira, hondakin-materialak kanpora ez isurtzeko moduan.
4.- Era berean, derrigorrezko da edukiontziak estaltzea lan ordutegia amaitu ondoren.
III TITULUA
HIGIEZINEN KANPOALDEA GARBITZEA
I KAPITULUA
Higiezin publiko eta pribatuak garbitzeari eta hiri paisaia errespetatzea.
33 artikulua.- Eraikinen elementuak eta kanpoaldea garbitzea eta mantentzea.
1.- Higiezinen jabeak eta establezimenduen titularrak behartuta daude horiek garbitasun publikoko baldintza egokietan mantentzera. Garbitu, eraberritu edo iztukatu egin beharko dituzte –bide publikotik ikusi daitezkeen fatxada, errotulu, tarteko horma, sarrera, sartzeko eskailera eta, orokorrean, higiezinari erantsitako elementu arkitektoniko eta materialen izaeraren arabera— zikinkeria egoera nabarmena denean edo Udal Zerbitzuen txostenaren ondoren Udalak agintzen badu.
2.- Burdin hesiak, balkoietako barandak, toldoetako burdineriak eta gainerako elementu metalikoak oxidorik gabe mantenduko dira. Horretaz gain, Udalak eskatzen badu, pintatu eta konpondu egin beharko dira.
34 artikulua.- Pankartak, kartelak, banderak eta eranskailuak.
Herri jabarian, egiturazko elementu, galtzada, espaloi, hiri altzari, murru eta hormetan, debekaturik dago udal baimenik gabe pankartak, kartelak, banderak eta eranskailuak jartzea, betiere jabeak onartzeari kalte egin gabe.
35 artikulua Pintadak eta grafitiak.
1.- Pintadak debekaturik daude, herri jabarian nahiz eraikin publiko edo pribatuetako fatxadetan, hiri altzari, arboladi, estatu, monumentu eta, orokorrean, hiriko paisaiaren edozein elementutan.
2.- Era berean, debekaturik daude grafitiak eta marradurak aurreko atalean adierazitako eremuetan.
3.- Salbuesten dira orube hesietan, obra itxituretan, mehelin-hormetan eta antzekoetan marraztutako muralak, betiere udal baimena lortu ondoren eta zehaztapenak betetzekotan.
4.- Eraikin publiko batean edo hiri altzariko elementuren batean pintadak egin, paperak jarri, kristaletan arrastoa egin, kartelak itsasten badira edo beste edozein jarduerak kaltetzen badu, Udalak enpresari edo pertsona arduradunari egotzi ahal izango dio garbitze eta egokitze fakturen kostua, dagokion zigorra aparte utzita.
II KAPITULUA
Urbanizazioak eta orubeak garbitzea.
36 artikulua.- Espazio pribatuak garbitzea.
1.- Lorategiak eta espazio pribatuen jabeei ez dagokie horiek garbitzea.
2.- Jabeek derrigorrezko izango dute etxadietako barne patioak garbitzea, baita orube partikularrak, merkataritza galeriak eta antzekoak ere.
3.- Udalak elementu pribatu hauen guztien garbitasun egoera kontrolatu eta ikuskatuko du, eta arduradunei eskatuko die garbitzeko, udal zerbitzuek jarritako irizpideen arabera.
37 artikulua.- Orubeak eta lursail pribatuak.
1.- Orube eta lursailen jabeak hondakin, zabor eta materialak pilatu gabe mantendu beharko dituzte, eta osasungarritasun, garbitasun, segurtasun eta apaintasun publikoko baldintza egokietan. Era berean, arratoiak eta intsektuak hil egin beharko dituzte baimendutako enpresa baten bidez.
2.- Artikulu honen 1. paragrafoan aurreikusitako egoera gertatzen ez bada, edo jabeak ez direla bertan egoten nabarmena bada, Udalak ordezkatzaile gisa eta indarrean dauden legezko mugekin batera beharrezko neurriak hartuko ditu, eta lursailean sartu ahal izango da baimen judiziala lortu ondoren, aurreko paragrafoan adierazitako helburuekin. Gainera, sortzen diren gastuak jabeei egotziko zaizkie.
IV TITULUA
HERRI JABARIA HARTZEA
I Kapitulua
Xedapen orokorrak
38. artikulua.- Irizpide orokorra.
Debekatuta dago herri jabaria lanak egiteko eta lanbidetarako erabiltzea eta, oro har, gainerako herritarrei mugak jar diezazkieketen beste edozein ekintza aurrera eramateko erabiltzea, herri jabariaren erabilera komun berezi eta erabilera pribatiboari dagokionean hurrengo artikuluetan jasotako araudiari kalterik egin gabe.
39. artikulua.- Erabilera komun bereziak.
1.- Jabari publikoko ondasunen erabilera komun berezia, aldi baterako okupazio lizentzia ematearen baitan egongo da, baldin eta herri jabari hori ez bada eraldatzen. Lizentzia horiek ezeztatu ahal izango dira interes publikoko arrazoiak daudenean, eta interesatuak ez du kalte-ordaina jasotzeko inolako eskubiderik izango.
2.- Eskumenak duen organoak herri jabariaren okupazioa ukatu ahal izango du trafiko, bide segurtasun, trazatu, egoera eta herri-lan arrazoiengatik edo interes orokorreko beste edozein arrazoirengatik.
3.- Erabilera horrek herri jabariko ondasunak eraldatu edo aldatzea eskatzen duenean edo zerbitzu publikoek ukituriko ondasunei dagokionean, kontzesio administratiboa lortzeko baldintzaren pean geldituko da.
4.- Erabilera pribatiboak edo aprobetxamendu bereziak dagozkien Prezio publikoak eta zergak ordaintzeko betebeharra ekarriko dute.
5.- Herri jabariaren okupazio bera hainbat lagunek eskatzen badute, erabakia hartzeko orduan objektibotasun, publizitate eta konkurrentzia printzipioak hartuko dira kontuan, baita deialdiaren oinarrietan jasotako gainerako meritu eta baldintzak ere.
40. artikulua.- Estetika.
Herri jabarian instalatzen diren elementuak Udalak zehaztutako inguruaren irudi-irizpideetara egokituko dira, eta segurtasunaren alorrean aplikatu beharreko arau guztiak beteko dituzte. Lizentzia edo kontzesioaren betebeharra da, elementu horiek eta haien inguruan erabilera eta garbiketa egoera onean edukitzea, dauden gainerako hiri altzariak, zuhaitzak eta landareak errespetatuz.
41. artikulua.- Erabilera orokorra.
Aurreko artikuluen ondorioetarako erabilera orokorra izango da derrigorrezko udal lizentzia dutenek establezimenduen kanpoan erakustokiak instalatzea, eta ez da aurrez aldi baterako lizentzia eskuratzeko beharrik izango, baldin eta eraikinen fatxada lerrotik ateratzen ez bada.
Fatxada lerrotik ateratzen diren erakustokiek baimena beharko dute. Edonola ere, erakustoki kontuetan Ordenantza honetako 43. artikuluak ezarritako arauei jarraituko zaie.
II Kapitulua
Elementuak herri jabarian
42. artikulua.- Makinak eta objektuak herri jabarian.
Debekatuta dago herri jabarian edo herri jabaritik sartu daitekeen lekuetan edozein eratako jolas-makinak eta kontsumo produktuak saltzeko makinak jartzea.
Dagokion baimenik gabe herri jabarian jarritako objektu, ondasun edo material oro, leku horretatik kendu eta eskumena duen agintariak zehatutako beste leku batera eraman ahal izango da, eta gainera, okupazioaren egileari dagokion zigorra jarri ahal izango zaio. Lekualdatze horrek eragindako gastuak haien arduradun jabe edo titularrei leporatu ahal izango zaizkie.
43. artikulua.- Erakustokiak herri jabarian.
Oro har, jarduera lizentzia eskatu aurretik aurreikusi beharko da, baldin eta erakustokia herri jabarian instalatzea beharrezkoa bada, atzeraeramangunea (erakusleihoa) fatxadako baoan, erakustokiak herri jabaria har ez dezan.
Salbuespen gisa baimendu ahal izango da, dagokion sektore legediak xedatzen duenari kalterik egin gabe, herri jabarian produktuak erakustokiak instalatuz erakustea, baldin eta horiek oinezkoei eragin diezaieketen usainik ez isuririk sortzen ez badute. Gainera, hurrengo arauei egokitu beharko zaie:
a) Establezimenduaren kanpoan ezin izango da erakusten diren produktuak saldu. Debekatuta dago herri jabarian produktu horiek pisatu, neurtu edo kobratzeko elementuak jartzea.
b) Erakustokiak behar bezala margotuta eta korrosiotik babestuak egongo dira, guztiz garbi, eta gurpilak izango dituzte alde batetik bestera eramateko. Era berean, beharreko finkatze-elementuak izango dituzte erabiltzen diren bitartean mugitu eta irauli ez daitezen, haien egiturak ez du ertz zorrotzik izango eta lurrean ez da inolako euskarririk jarriko erakustoki horien egonkortasuna bermatzeko.
c) Bertan instalaturiko hiri altzarien elementuak kendu ondoren, 2 metrotik gorako azalera duten espaloietan soilik jarri ahal izango dira erakustokiak.
d) Instalatu beharreko elementuek kokatzen diren espaloiaren herenaren zabalera izango dute gehienez, eta betiere, metro bat baino txikiagoa.
e) Erakustokiak eraikinaren fatxadari loturik instalatuko dira, eta instalazio horren luzerako garapena ez da establezimendurako sarrerari dagokion luzera kendu ondoren establezimenduak hartzen duen fatxadaren luzera baino handiagoa izango.
f) Erakustokiak establezimenduaren kanpoaldean eduki ahal izango dira merkataritza ordutegian. Ordutegi hori amaitzean erretiratu egin beharko dira, eta okupatzen zuten herri jabaria garbi utziko da.
g) Erakusten diren produktuak elikagaiak badira, lurretik 75 cm-ko altueran jarriko dira gutxienez, eta gainerako produktuak, berriz, lurretik 60 cm-ra. Erakustokiak lurreraino luzatuta egon beharko du bere oinplano proiekzio osoan.
h) Erakustokiek nahi adina apal izango dituzte, lurretik gora 1,75 metroko altuera arte. Erakustokiak eta merkantziak osaturiko multzoa ez da 2 metrotik gorakoa izango.
Udalak, udal zerbitzu teknikoek beharreko txostena egin ondoren, inolako erakustokirik jartzeko baimena ukatzeko gaitasuna izango du zirkunstantzia bereziak egotegatik, gehienen onerako komeni denean.
Era berean, Udalak agindu ahal izango du aipatutako elementuak erretiratzeko, baldin eta hiri altzariei buruzko udal irizpideak errespetatzen ez badituzte, edo jendea espaloietan gelditzea gertatzen bada eta horren ondorioz mugitzeko oztopoak eragin edo herri jabarian normal ibiltzea galarazten bada.
44. artikulua Herri jabarian filmak filmatzea.
Filmen filmaketa herri jabarian, eta zehatzago adierazteko, udal lorategi eta parkeetan, lizentzian zehaztutako leku, ordutegi eta baldintzetan egingo da.
45 artikulua - Herri jabarian dauden kioskoak
1.- Kasu guztietan, herri jabarian dauden kioskoek baldintza-agirian zehaztutako arauak beteko dituzte, baita bide publikoa aldi batean okupatzeko kontzesio erabaki edo lizentzian zehaztutakoak ere.
2.- Kioskoek hiriko zerbitzu publiko eta apainduran lagunduko dute, eraikitzeko erabilitako materialen, argitasunaren, erabilera orokorreko prestazioen edo dituzten instalazio osagarri berezien bidez, hau da, ordua emateko gailuak, seinalizazio klimatologikoa, telefono publikoa, turismo eta ikuskizunen kartelak eta antzeko beste tresna edo zerbitzuak.
3.- Kioskoaren instalazioa ez da inoiz ere aitzakia gisa erabiliko emaniko erabilera pribatiboaren perimetroa zabaltzeko, kaxa, asto edo argitalpenak erakusteko beste edozein elementuren bidez. Arau hori ez bada betetzen, dagokion zigorraren kalterik gabe, udal zerbitzuek arestian aipaturiko elementu horiek erretiratuko dituzte kontzesiodunaren edo herri jabaria hartzeko lizentziaren titularraren kontura.
4.- Kioskoaren edo establezimenduaren edozein "inter vivos" zesio, alokairu edo eskualdatze egiteko, "mortis causa” esate baterako, Udalak onartu eta baimendu behar du, jabe berriak Administrazioak eskatzen dizkion baldintzak bete ditzan, eta administrazioak eskualdatzeari uko egin ahal izango dio ulertzen badu jabe berriak ez dituela zehaztutako baldintzak betetzen.
46 artikulua.- Kiosko motak
1.- Herri jabarian kokaturiko kioskoak argitalpenenak, ONCE erakundearenak edo Udalak erabakitako beste edozein gauzarenak izan daitezke.
2.- Argitalpenen kioskoek liburuak, aldizkariak eta nazioko eta atzerriko egunkariak sartzea izango dute xede, eta hainbat kategoriatan sailkatu ahal izango dira instalazio lekuen edo saltzen dituen argitalpenen motaren arabera, herri jabaria hartzeagatik dagokion kontzesioaren kanona edo tasa zehaztu ahal izateko. Udal zerbitzuei dagokie kiosko horien diseinua eta kokalekua zehaztea.
3.- Estatuko Itsuen Erakundeko kideek beren jarduera herri jabarian burutu ahal izango dute zehazten den kopuru eta moduan. Udal zerbitzuek salmenta kabinen diseinua zehaztu ahal izango dute, eta kabina horien banaketa diseinatu ahal izango dute Erakundearen Herrialdeko Ordezkaritzaren onarpenarekin.
III KAPITULUA
Herri jabariaren garbiketa erabilera komun bereziaren, erabilera pribatiboaren eta ekitaldi publikoen ondorioz.
47. artikulua.- Erabilera berezi edo pribatiboak ukituriko eremuaren garbiketa.
1.- Erabilera komun berezi eta pribatiboaren ondorioz herri jabaria zikintzen bada, erabilera horien baimena duten edo esleipendunak diren pertsona fisiko edo juridikoen erantzukizuna izango da. Sortzen dituzten hondakinak bota edo edukitzeko ontzi homologatuak jartzeko eskatu ahal izango die Udalak, eta ontzi horiek ere garbitu egin beharko dituzte. Gainera, berrerabiltzeko eta birziklatzeko hondakinak badira, baimendutako entitateek gaikako bilketa kudeatuko dute.
2.- Espazio publikoan terrazak (horiek finkoak izan ala ez) dituzten establezimenduetako titularrek, taberna, kafetegi, kiosko, salmenta-postu eta antzekoetan, behartuta daude garbitasun baldintza egokiak mantentzera eragindako hiri espazioan. Dena den, gehienez 20 minutuko epean egin beharko dute, baimenean mahaitxoak eta terrazak jartzeko aurreikusitako amaiera ordutik kontatzen hasita, eta, gainera, egunean zehar etengabe mantendu beharko dute, uneoro indarrean dagoen Herri Jabarian edo Erabilera Publikoko gunetan Terrazak eta Mahaitxoak Instalatzeko Udal Ordenantza Arautzailea betetzeari kalterik egin gabe. Udalak terrazetako kontzesio titularrei eskatu ahal izango die ontzi homologatuak instalatzean sortzen dituzten hondakinak gaika utzi eta biltzeko, eta, era berean, ontziak garbitzea egokituko zaie.
3.- Asteroko azoka txikiko salmenta ibiltariko saltzaileek hartutako lekua garbitasun egoera egokian utzi beharko dute behin salmentak bukatu ondoren, eta bere jardueran sortutako zaborren gaikako bilketaren arduradunak izango dira. Era berean, tokiko produktuen eta Bertako elikagaien eguneroko azokan saltzaileei –baserritarrak- egokituko zaie, une bakoitzean Salmenta Ibiltariaren Udal Ordenantza betetzeari kalte egin gabe, hala nola salmenta ibilitariko postuak instalatzea baimentzen duen lizentzian ezarritako baldintzen arabera.
48 artikulua.- Ekitaldi publikoak egitea.
1.- Jabetza publikoko espazioetan ekitaldi bat antolatzen duten antolatzaile pribatuak izango dira ospakizun horretatik etorritako zikinkeria kudeatzeko eta biltzeko erantzuleak.
2.- Hiriko garbitasunaren ondorioetarako, ekitaldi publikoen lekua, ibilbidea eta ordutegia Udalari jakinarazteko betebeharra dute antolatzaileek. Udalak fidantza bat jartzeko eskatu ahal izango die eragin ditzaketen garbiketa lan berezien arabera. Ukituriko espazio librea garbiketa baldintza egokietan baldin badago, itzuli egingo da fidantza hori. Bestela, hartatik kenduko da egin beharreko garbiketa lan berezi horien kostua.
3.- Era berean, herri jabarian era horretako behin-behineko establezimenduak ezartzen direnean, aplikatu beharreko higiene-osasun baldintzak betetzeaz gain, ur hartuneak eta hustubideak jarriko dira saneamendu sarera, eta beharreko neurriak hartuko dira hondakinak ohiko edukiontzietan uzteko gaika bilduta, gero birziklatu ahal izateko, eta zeregin horretarako espres jarritakoetan.
4.- Era berean, ekitaldi publikoetan Udalak erakunde antolatzaileari eskatu ahal izango dio mugikortasun iraunkorreko eta energia eraginkortasuneko irizpideak ezartzeko, baita beste edozein neurri zuzentzaile ekitaldiak berak ingurumenean sortutako eraginak edo bestelakoak gutxitzeko ere.
49. artikulua.- Jaialdietan animaliak erabiltzen direnean.
Ekintza edo jaialdietan animaliak erabiltzen badira, sortzen duten zikinkeria garbitu beharko dute antolatzaileek, ekitaldia bukatu eta animaliak erretiratu bezain laster.
Animaliak garraiatu eta eramango dira, gai horren inguruan indarrean dagoen legediaren arabera.
50 artikulua.- Kanpatzea.
1.- Ezin izango da kanpatu, eta kanpin dendak edo horretarako egokituriko ibilgailuak jarri beharrezko baimenik ez duten eremu publiko edo pribatuetan. Ezin izango da herri jabarian janaria prestatu edo aulkiak eta mahaiak jarri, horrelakorik eskatzen duen jardueretarako izan ezik, eta horretarako udal baimena lortu behar da derrigorrez.
2.- Agintaritzaren Agenteek herri jabaria okupatzen duten kanpin denden, ibilgailuen edo beste edozein eratako materialen jabe edo erabiltzaileei jokabide hori zuzentzeko eskatuko diete, eta salaketa ere egin ahal izango dute. Ezezkoa emanez gero edo jabeak edo erabiltzaileak ezin badira aurkitu, Agintaritzaren Agenteek beharrezko bideak erabili ahal izango dituzte elementu horiek berehala erretiratzeko, eta sortutako gastuak jabeek ordainduko dituzte. Arau orokor gisa, egin behar dutenek egin ezean, udal zerbitzuek egingo dute garbiketa, baina kostuak haiek ordainduko dituzte.
V TITULUA
ZIGOR ERREGIMENA
I Sekzioa
Arau-hausteak eta zigorrak.
51. artikulua.- Arau-hausteak.
1.- Arau-hauste administratiboa izango da Ordenantza honek zehaztutako xedapenak ez betetzea eta bertan zehazten diren debekuak urratzea.
2.- Alkatetzak edo hark aukeratutako Organoak zigortuko ditu Ordenantza honetan xedaturikoaren arau-hausteak, Titulu honetan xedaturikoaren arabera, legeriak baimentzen dituen mugen barnean, eta kasu bakoitzean egon litezkeen erantzukizun zibil eta penalen kalterik gabe.
52 artikulua.- Arau- hauste motak
1.- Arau-hausteak arinak, larriak eta oso larriak izan daitezke, honako hauek kontuan harturik: nahita egiten den, zibismo eza jokabidean, zabarkeria maila, pertsonen osasun eta segurtasunerako arriskua, eragindako kaltearen larritasuna eta arau-haustea berriro egitea.
2.- Ondorio horietarako, berriro ere arau-haustea egin dela ulertuko da, behin betiko ebazpen batek arau-hausleak aurreko hamabi hilabeteetan edo gehiagotan izaera bereko arau-haustea egin duela erabakitzen badu.
3.- Arau-hauste arinak izango dira honako artikulu hauei eginiko arau-hausteak:
8 artikulua, 1. eta 3. atalak.
12 artikulua, 2. atala, a), b), c), f), g), h), i), j) y k).
13. artikulua.
14. artikulua, 2. atala, a), b), d), e), h), i).
15. artikulua, 3. atala, e).
16. artikulua.
19. artikulua, 1., 2. eta 3. atalak.
20 artikulua, 1. atala.
21., 22., 23., 24., 25., 26., 27., 32., 33., 34., 38., 39., 40., 47., 48., 49. eta 50. artikuluak
Era berean, arau-hauste arina izango da:
• Ordenantza honetako arau larri edo oso larri gisa tipifikaturik ez dagoen edozein arau ez betetzea
• Herri jabariko ondasunetan kalteak eragitea, kalte horien zenbatekoa 10.000 eurotik gorakoa ez bada.
• Agintaritzaren Agenteek emaniko agindu bat ez betetzea, Ordenantza honen zehaztapenak betetzeko eskakizunari loturik dagoenean, baldin eta arau-hauste horrek izaera penala ez badu.
4.- Arau-hauste larriak izango dira honako artikulu hauei egindako arau-hausteak:
12 artikulua, 2. atala, d) eta e),
14 artikulua, 2. atala f) eta g)
15 artikulua, 3. atala, a), b), d)
19 artikulua, 4. atala.
20 artikulua, 2. atala.
28, 29, 30 eta 31 artikuluak.
35, 36, 37, 42, 43, 44 eta 45 artikuluak.
Arau-hauste larria izango da herri jabariko ondasunetan kalteak egitea, kalte horien zenbatekoa 10.000 eurotik gorakoa eta 1.000.000 (ehun mila) euro baino txikiagoa denean.
5.- Oso arau-hauste larriak izango dira honako artikulu hauei eginiko arau-hausteak:
14. artikulua, 2. atala, c)
15. artikulua, 3. atala, c)
Oso arau-hauste larria izango da herri jabariko ondasunetan kalteak egitea, kalte horien zenbatekoa 100.000 (ehun mila) eurotik gorakoa denean.
53 artikulua.- Zigorrak.
1.- Arau-hauste arinei 60 eta 750 euro arteko isuna jarriko zaie; arau-hauste larriei 751 eta 1.500 euro artekoa; eta oso arau-hauste larriei 1.501 eta 3.000 euro artekoa.
Zenbateko horiek aplikatu ahal izango dira, dagokion sektoreko araudiak zehatz ditzakeen isunen kalterik gabe, eta hala denean azken hori aplikatuko da.
2.- Ezar daitezkeen isunak alde batera utzita, behar bezala ordainduko dira herri jabariko ondasunetan eginiko kalteak, baita eragindako galerak ere, hori guztia dagokien udal zerbitzuek aurrez ebaluatu ondoren. Kalte eta galera horien zenbatekoa modu betearazlean zehaztuko du isuna jartzeko eskumena duen organoak.
3.- Arau-hauste larriak edo oso larriak behin eta berriro egiten badira, arau-hauslea baimenen eta kontzesioen jabe izateko gaitasunik gabe utzi ahal izango da, bat eta hiru urte arteko epean.
4.- Ordenantza honi egindako arau-hausteetan erabilitako tresna edo instrumentuak nahiz arau-hauste horretatik lortutako emaitza konfiskatu ahal izango ditu Udaltzaingoak.
54 artikulua.- Isunen ordezko borondatezko lanak.
1.- Hona hemen zehazten diren isun ekonomikoen ordezko formulak: kaltea konpontzea eta borondatezko lanak.
2.- Arau-hausleak eginiko kalte materiala konpontzen badu, bere borondatez eta zigor espedientea hasi baino lehen, espedientea ez irekitzeko eskatu ahal izango du baldin eta Udalak ez badu jakiten arau-hausleak jokabide ez-zibikoa izan duela behin baino gehiagotan.
3.- Arau-hauste baten ondorioz gainerako herritarrei eginiko kalteak ahal den neurrian konpondu ahal izateko, arau-hausleak isuna barkatzeko eskatu ahal izango du, gainerako komunitatearen onerako borondatezko lanak egiteko edo jokabide zibikoak sortzeko edo antzeko ekintzek eragindako kalteak konpontzeko konpromisoa hartuz. Kontuan izanik lan horien borondatezko izaera, ez da isuntzat hartuko, eta, gainera, ez da izango inolako ordainketa ekonomikorik izateko eskubiderik.
II Kapitulua
Erantzuleak
55 artikulua.- Erantzuleak
1.- Ekitaldi publikoetan antolatzailea edo sustatzailea izango da erantzulea.
2.- Sustatzaileari eta kontratistari dagokie solidarioki, beren obrek ukituriko herri jabariaren garbiketaren erantzukizuna, karga eta deskarga lanetan eta obretan sartu eta haietatik ateratzean ibilgailuek sorturiko zikinkeria barne, hurrengo puntuan zehaztutakoari kalterik egin gabe. Sustatzailea eta lurzoruaren jabea ere batera erantzule izango dira.
3.- Jabeak, eta subsidiarioki animaliak eramaten dituzten pertsonak dira animalia horiek beste pertsona edo gauzei egin diezazkiekeen kalteen eta animalia horiek sor dezaketen zikinkeriaren erantzuleak.
4.- Iragarkia egiten duena izango da kanpoko publizitateari dagozkion arau-hausteen erantzulea.
5.- Gainerako kasuetan, Ordenantza honetan jasotakoa pertsonalki urratzen duena izango da erantzulea.
56 artikulua.- Kalteak ordaintzea.
1.- Arau-hausleek eginiko kalteak, erantzukizuna duten pertsonek ordainduko dituzte beti.
2.- Gurasoak edo tutoreak edo zaintzaileak izango dira ardurapeko adingabeek egindako arau-hausteen kalteen erantzule zibil subsidiarioak.
3.- Udalak, dagokion zigor espedientea hasi ondoren, erantzulearen kontura, beharrezko ekintza guztiak egingo ditu gauzak arau-haustea baino lehen zeuden egoerara itzultzeko, dagozkion isunei kalterik egin gabe.
4.- Udaltzaingoak Ordenantza honetan xedaturikoa urratzen duten ekintza larriak geldiarazteko agindua emango du, eta obeditzen ez duten arau-hausleei ez die utziko arau-hausteak egiten jarraitzen, dagokion isunari kalterik egin gabe.
57. artikulua.- Zigor prozedura.
1.- Zigortzeko eskumena erabiltzea Estatuko legedian ezarritakoaren araberakoa izango da. Bertan Euskal Autonomia Erkidegoko Herri Administrazioen zigortzeko eskumena arautzen da.
2.- Zigor prozedura hasteko eskumena duen organoak ekintza arau-hauste administratiboa izateaz gain arau-hauste penala izan daitezkeela jakitean, eskumena duen organo judizialari jakinaraziko dio, eta zigor prozedurak ez du aurrera egingo, behin hasi ondoren, agintaritza judizialak bere erabakia jakinarazten ez duen arte. Horrez gainera, gauzak arau-haustea baino lehen zeuden egoerara bihurtzeko zuhurtasunezko neurriak hartu ahal izango ditu Udalak. Zigor espedientea geldirik dagoen bitartean, arau-haustearen preskripzio epea nahiz prozeduraren iraungitze epea geldirik daudela ulertuko da.
58 artikulua.- Preskripzioa
1. Ordenantza honetan aurreikusitako arau-hausteak eta zigorrak preskribatuko dira:
- Arau-hausteak arinak badira, sei hilabetetara, larriak badira bi urtera, eta oso larriak badira hiru urtera.
- Zigorrak: arau-hauste arinak direla eta jarritakoak, urtebetera, hutsegite larriak direla eta, bi urtera eta oso hutsegite larriak direla eta jarritakoak hiru urtera.
2. Arau-hausteen preskripzio epea kontatuko da hura egin den egunetik aurrera.
Zigor-prozedura hasteak, interesatua jakinaren gainean dagoela, preskripzioa etengo du, eta preskripzio epea berriz igaroko da zigor-prozedura hilabetetik gora geldituta balego, ustezko erantzuleari egotz ezin dakiokeen arrazoiren bat dela eta.
3. Zigorren preskripzio epea kontatzen hasiko da ezarritako zigorraren ebazpena indarrean jartzen den egunaren biharamunetik aurrera.
Betearazte prozedura hasteak, interesatua jakinaren gainean dagoela, etengo du preskripzioa, eta preskripzio epea berriz igaroko da zigor-prozedura hilabetetik gora geldituta balego, ustezko erantzuleari egotz ezin dakiokeen arrazoiren bat dela eta.
XEDAPEN GEHIGARRIA
Ordenantza honetan xedatutako zigor-araubidea aplikatuko da, dagokion sektore araudiak ezarri dezakeenaren kalterik gabe, eta hala denean azken hori aplikatuko da.
AZKEN XEDAPENA
Gipuzkoako Aldizkari Ofizialean argitaratu eta handik 15 egunera hasiko da indarrean Ordenantza hau.
No hay comentarios:
Publicar un comentario